Il-films ta' Tafxnaf se jkunu qed jintwerew f'Leeuwarden!
Tafxnaf, proġett tal-Fondazzjoni Valletta 2018, twieled ma' proġett ta' Leeuwarden-Fryslân 2018, li dak iż-żmien kien jismu Behind the Front Door u li llum jismu Look@me. Wara li l-proġetti kibru għal rashom, b'mod differenti, tajjeb li issa l-films li ħarġu minnhom se jintwerew fl-istess post, waqt in-Noordelijk Film Festival.
Xi ħaġa eċċitanti hi li l-films ta' Tafxnaf se jintwerew fuq żewġ vapuri — fis-7 u fl-10 ta' Novembru 2018 fuq it-Theaterskip Bald'r u fid-9 ta' Novembru fuq is-Scheepsatelier Eestrom!
Fid-9 ta' Novembru ukoll, waqt l-istess festival, se jkun hemm il-première tal-films ġodda ta' Look@me. Il-parteċipanti ta' Tafxnaf ivvutaw u għażlu wieħed mill-films, Hazel, biex jidher waqt il-première. U forsi se jkun hemm xi sorpriża wkoll... (Ritratti: Jantina Talsma)
Il-films ta' Tafxnaf, flimkien ma' ħames films mill-proġett Look@me ta' Leeuwarden-Fryslân 2018, intwerew fis-Citadel Cinema, ir-Rabat Għawdex, nhar il-Ħadd 16 ta' Settembru fis-14:30. Wara kien hemm intervista qasira ma' wħud mill-parteċipanti u
mill-atturi.
Tafxnaf fil-Valletta
Film Festival 2018
Il-films ta' Tafxnaf kellhom il-première is-Sibt 9 ta' Ġunju 2018 waqt il-Valletta Film Festival.
Il-films reġgħu ntwerew il-Ħadd 10 ta' Ġunju fis-14:30, u l-Ġimgħa 15 ta' Ġunju fl-16:30.
Il-wirjiet ittellgħu fil-Valletta Campus Theatre flimkien ma' ħames films mill-proġett Look@me ta' Leeuwarden-Fryslân 2018 – il-Belt Kapitali tal-Kultura l-oħra għal din is-sena.
X'taf fuq Tafxnaf?
Tafxnaf hu proġett tal-Fondazzjoni Valletta 2018 li beda billi stieden lill-istudenti kollha tal-Form 2, f'Malta u Għawdex, biex jiktbu storja jew ipinġu stampa li tirrakkonta aspett ta’ ħajjithom.
Għadd ta' skejjel ħadu sehem fil-proġett, u ħafna organizzaw sessjonijiet tal-PSCD fejn it-tfal qraw l-istejjer lil xulxin.
Minn dan il-proċess ħarġu għadd ta' stejjer sbieħ, interessanti, u li jqanqlu wkoll.
L-istudenti vvutaw fuq l-iktar storja li għoġbithom.
L-istejjer magħżula għaddew f'idejn iż-żgħażagħ li hemm fuq il-Kunsill tat-Tfal, biex minnhom għażlu l-25 storja li għaddew għall-fażi li kien imiss – sensiela ta' workshops fuq iċ-ċinema u n-narrattiva.
Waqt dawn il-workshops, il-parteċipanti għażlu ħames stejjer, u nqasmu f'ħames gruppi. Kull grupp ħadem waħda mill-istejjer f'film ta' ħames minuti. Il-films qed jintwerew għall-ewwel darba waqt il-Valletta Film Festival 2018, u se jintwerew f'drabi oħra kemm f'Malta kif ukoll lil hinn minn xtutna.
Kull storja li nkitbet għal Tafxnaf, però, se tittella' fuq dan is-sit, u se tiġi arkivjata fil-Bibljoteka Nazzjonali!
Jekk għandek 13-il sena jew iktar, segwi l-paġna tagħna fuq Facebook:
Għandek xi mistoqsija?
Jew xi kumment? Iktbilna!
Tafxnaf hu proġett edukattiv tal-Fondazzjoni Valletta 2018.
Mistoqsijiet jistgħu jintbagħtu lil info@tafxnaf.org.
©2018 Kull jedd miżmum.